បច្ចុប្បន្ន ការខលទូរស័ព្ទដោយប្រើប្រាស់លេខប្លែកៗ ដែលពុំស្គាល់ កើតមានឡើងច្រើនមកលើពលរដ្ឋកម្ពុជា ហើយវាគឺជាគម្រោងឆបោកប្រាក់ (Money Scam) ដែលមានឈ្មោះថា "Callback Scam" ឬហៅម្យ៉ាងទៀតថា "One-Ring Scam"។
Callback Scam ជាបច្ចេកទេសកាត់ប្រាក់ពីគណនីទូរស័ព្ទជនរងគ្រោះ ដោយប្រើប្រាស់សេវា ដែលហៅថា International Premium Rate Number (IPRN)។ ក្រុមបណ្តាញឧក្រិដ្ឋជនបានទិញសេវាលេខទូរស័ព្ទ IPRN ពីក្រុមហ៊ុនផ្តល់សេវាទូរស័ព្ទ រួចខលចេញទៅគោលដៅក្រៅប្រទេសជុំវិញពិភពលោក ក្នុងនោះក៏មានព្រះរាជាណាចក្រកម្ពុជាផងដែរ។
ដូចនេះ សូមមេត្តាប្រុងប្រយ័ត្នដូចខាងក្រោម៖
- ការខលទូរស័ព្ទចេញពីក្រៅប្រទេសតាមក្រុមហ៊ុនផ្តល់សេវាទូរសព័្ទ ដែលមានដូចជា៖ ប្រទេសម៉ាឡាវី (+265), អាហ្វ្រិក (+27), នីហ្សេរីយ៉ា (+234), ប៉ាគីស្ថាន (+92), ប្រទេសរុស្សី (+7) និងប្រទេសជាច្រើនផ្សេងទៀត។
- ការបន្លំនៃការខលគឺក្រុមឧក្រិដ្ឋជនព្យាយាមខលជាច្រើនដង ដែលបង្ហាញ Missed Call លើទូរស័ព្ទជនរងគ្រោះ។
- នៅពេលជនរងគ្រោះធ្វើការទទួលឬខលទូរស័ព្ទទៅវិញ តម្លៃសេវាគឺមានតម្លៃថ្លៃ និងកាត់ពីគណនីទូរស័ព្ទជនរងគ្រោះដោយស្វ័យប្រវត្តិ។
- ក្រុមឧក្រិដ្ឋជននឹងទទួលបានប្រាក់កម្រៃជើងសារ (Commission) ពីក្រុមហ៊ុនផ្តល់សេវាទូរស័ព្ទ។
វិធីការពារពីការឆបោក មានដូចខាងក្រោម៖
- ត្រូវចៀសវាងការទទួលឬខលទូរស័ព្ទត្រឡប់ទៅវិញដែលយើងមិនបានស្គាល់ ព្រោះលេខនោះអាចជា IPRN។
- ប្រើប្រាស់កម្មវិធីសម្រាប់ទូរស័ព្ទដៃក្នុងការស្វែងរកប្រភពលេខទូរស័ព្ទ តួយ៉ាងកម្មវិធី TrueCaller។
- សូមរាយការណ៍ទៅកាន់ក្រុមហ៊ុនផ្តល់សេវាទូរស័ព្ទរបស់លោកអ្នក។
- សូម Block លេខទូរស័ព្ទសង្ស័យ ដោយប្រើប្រាស់កម្មវិធីមានស្រាប់ក្នុងទូរស័ព្ទដៃរបស់លោកអ្នក។
